Викторин митрополитлэн Пасхаен ӟечкылан гожтэтэз

Ижкар-Удмурт митрополияысь Викторин митрополитлэн Ижкар но Сарапул епархиосысь священникъёсты, монахъёсты, мирын улӥсьёсты Пасхаен ӟечкылан гожтэтэз

«Лыктэлэ, вань калыкъёс, Христолы кырӟаса йыбырттоме, солэсь Кулэмысь Улӟыса Султэмзэ данъяломе, Со уго милям Инмармы,  тушмонлэн эрекчаськемезлэсь дуннеез Мозмытӥсь»

Быдӟым субботае Ӝыт службаысь стихира

Дун-шектэм Быдӟым Визьлэсь удыссэ ортчыса, куке котькуд адями быгатэмезъя аслэсьтыз пушдуннезэ ӟеч ужъёсын узырмытыны тыршиз, ми туннэ сюлмынымы куалектыса, миро нуллӥсь святой кышномуртъёс сямен ик, пеймыт уй пыр ӵук ӟардон пала вамыштӥськомы, та шумпотон уез таӵе кылъёсын югдытыса:

Христос Улӟыса Султӥз! – Зэм ик Улӟыса Султӥз!

Быдэс дуннелэсь радлыксэ воштӥсь та уй дырысен кык сюрс аръёс ортчизы ини. Озьы ке но, Христос-Инмарлэн Улӟыса Султэмез – со огшоры йылолъёсын-сямъёсын юнматэм, кыӵе ке югдурез тодэ ваён праздник гинэ ӧвӧл. Кузё-Инмарлэн Пасхаез – со сыӵе югдур, кудӥз одӥг пол кемдӥз но быдэс адями выжылы – азьло улэмъёслы но, туннэ улӥсьёслы но – али но йӧнолыко луэ. Пасха адямилэн улонэзлэсь вань радлыксэ вош­тӥз, уго Христослэн Улӟыса Султэмез пыр асьмелы оскиськон сётэмын, асьмелэн та музъем вылын улонмы уз быры, азьланяз со Инмысь Эксэйлыкын  выльысен азьланьтӥськоз на шуыса.

Озьы ке но, адями выжылэн тушмонэз, солэн ужъёсысьтыз кулон аслыз кужым шедьтӥз, жалянэз уг тоды но котькуд вакытэ адямиез кутон понна выль амалъёс шедьтылэ, адями­лэсь йырсазьзэ но лулзэ сисьмон-бырон сюрес вылэ вамыштытэ. Али асьмеос адӟиськомы, кызьы выль но выль черкъёс пуктылӥсько, нош калыкез отын ӧжыт, куддыръя бадӟым праздникъёсы но буш сылон итыос кылё. Христиан праздникъёсты но пусъйыку адямиос ӵемысь со праздникъёсты духовной пуштросэн уг тырмыто, малы ке шуоно соослэн сюлэмъёсазы зэмос осконлэн тылыз уг ӝуа, зэмос яратонлэн шунытэз ӧвӧл: вуж нимын улӥсь праздникъёс выльдэм, мыдланьтэм пуштросэн тырмытӥсько. Ӵемысь Христослэн нимыз, Солэн зэмлыкез отысь чылкак палэнтэмын луэ. Та югдур арлы быдэ золгес но золгес шӧдӥське.

Соин ик та святой праздник нуналъёсы мон тӥледлы вазисьскисько: асьме осконлэсь дунлыксэ утьыны тырше, малы ке шуоно со асьмелы дунне вылысь вань дуно макеослэсь но дуногес луэ. Курисько тӥледыз сюлэмъёсады христиан осконлэсь дэлето тылзэ утьыны, кудзэ Христос-Инмар Улӟыса Султэменыз Аслаз шайкоросаз кенжытӥз. Со тылэз кысэмезлэсь ӟеч ужъёсыныды утьыны быгатӥськоды: ог-огдэс яратонэн, гажан-жалянэн, курадӟисьёсты буйгатонэн, ёрмыса улӥсьёслы юрттэмен. Ӵемысь та ужъёс гинэ асьме осконлэн зэмлыкез сярысь вераны быгато.

Христослэн Улӟыса Султэмезлы шумпотыса, Инмар тӥледыз бакель мед кароз шуыса курисько. Солэн гажан-жалянэз но дэлетэз тӥледыз но тӥлесьтыд семьяостэс, матысь муртъёстэс мед утёз, ужъёсады но котьку мед юрттоз. Та бырылӥсьтэм шумпотон асьмелы кужым мед сётоз, асьмедыз утись Инмарез ӟеч ужъёсынымы данъяса улыны мед быгатомы.

ВИКТОРИН

ИЖКАР-УДМУРТ ЕПАРХИЫСЬ МИТРОПОЛИТ,

САРАПУЛ ЕПАРХИЕН ОГДЫРЛЫ КИВАЛТӤСЬ.

 Христослэн Пасхаез

Ижкар, 2022 ар