Викторин митрополитлэн Пасхаен ӟечкылан гожтэтэз

Ижкар-Удмурт митрополиаысь Викторин митрополитлэн

Ижкар-Удмурт епархиаысь священникъёсты, монахъёсты, мирын улӥсьёсты

Пасхаен ӟечкылан гожтэтэз

Кузё-Инмарен яратэм сӥлы атайёс,

гажано агай-вынъёс, сузэр-апайёс!

“Инмар сокем дуннеез яратӥз, 

Аслэсьтыз одӥг вордӥськем Пизэ сётӥз, 

котькудӥз но Солы оскись мурт медаз быры, 

солэн быронтэм улонэз мед луоз шуыса” (Ин. 3: 16)

Йылпумъяськиз Быдӟым Визьлэн вакытэз, кудӥз асьмемыз арысь аре пуш ляблыкъёсмы пала берыктэ но котькуд курадӟисез кӧсутён но сьӧлыкъёслэсь куштӥськон пыр бурмытӥськыны ӧте. Лулъёсмес озьы чылкытатыса, асьмеос Христослэн Улӟыса Султонэзлы сӥзем быдӟым шумпотымон праздникез пумитаны дасясьскиськомы, кызьы со сярысь блаженной Августин шуэ: “Быдӟым Визьлэн нуналъёсыз туала вапумлэсь улонзэ адӟыто, озьы ик Пасхалэн нуналъёсыз пумтэм шудо улонэз возьмато. Визь дыръя ми чигиськыса улӥськомы,  нош  Пасха вуэ но асьмеос  шудбурен  тыр  луиськомы”.

Озьыен, асьмеос понна кулэмысь Улӟыса Султэмлы шумпотыса, асьмеос но лулпуш шулдыряськонэн тыр луомы! Пасхалы шумпотонэн агай-вынлыко яратонэн огмес огмы ӟыгыртомы. Пумтэм дыръёс ӵожелы утён ваись яратонлэсь кужымлыксэ возьматомы, матысьёсмес но кыдёкысьёссэ эшъёсмес-тодмоосмес но таӵе святой кылъёсын ӟечкылаломе:

Христос Улӟыса Султӥз!

Кызьы куке но нырысетӥ Адамлэн кылзӥськись луымтэеныз,  вылтӥясь сяменыз сэрен вань адями выжы сьӧлыклэн пеймытлыказ, кулонлэн кивалтэтаз сюриз но, кырдуннеын йыромыса ветлӥсь калыклы пӧрмиз; озьыен туннэ но Выль Адам – Христос-Утисьмы – Аслаз вормонэ нуись яратонэныз кулонлэсь кужымзэ быдтэ но сьӧлыклэсь жильыетсэ-сьӧлтэтсэ куштэ, вань адями выжылы  Выльысь  Инмар  Атайлы  нылпи  луон  данзэ  берыктэ.

“Кузё-Инмарлэн кулонэз асьмелы кулонтэм улон сётӥз; ад пыдэсэ васькыса, Со адлэсь ӟигарзэ быдтӥз, солэсь кужымлыксэ куашкатӥз”, — вера со сярысь Иоанн Златоуст святитель.

Кылем арын асьмелэн Пасхаен герӟаськем шумпотонмы сӧрэмын вал витьымтэ коронавирус висёнлэн быдэс дуннее вӧлмеменыз йырин. Соку висёнлэсь утён понна ортчытэм ужрадъёсын сэрен тросэз асьме пӧлысь черкъёсы лыктыны но Пасхалы сӥзем вӧсяськонъёсы пыриськыны ӧз быгатэ. Нош туннэ, ар ортчем бере, нош ик вӧсяськонъёсы пыриськыны луонлык басьтыса, асьмеос Кузё-Инмармы дорысь быдӟым буйгатскон шедьтӥськомы. Соин саклыкмес котькыӵе алексъяськон ужъёс вылэ юнме быдтыса ум улэ. Быдэс Дуннеез Кылдытӥсьлы, гробысьтыз асьмелы оскиськон ваись Инмармылы тау карон кылъёсын туннэ вӧсяськоме, сюлэмъёсмес праздник понна шумпотонэн тырмыттоме! Ӧтисько тӥледыз та сӥё-дано ужрадэз дунъяны, малы ке шуоно асьмелэн туннэ луонлыкмы вань Улэп Инмарлэн коркаяз пырыса, Пасха кырӟанъёсын Сое данъяны. Та шумпотонэн сюлэмъёсмес тырмыттоме но, сое асьме семьяосамы нуоме. Со сяна, та шумпотонмес шори люкомы сыӵе адямиосын но, кинъёс Пасха нуналэз, яратонлэсь шунытсэ, паймымон ужез кадь витьыса улӥзы.

Кузё-Инмарен яратоно атайёс, агай-вынъёс, сузэр-апайёс! Улон Сётӥсь Христослы тыршыса вӧсяськисько тӥ понна, тӥляд тазалыкты, шудбуро улонды понна. Инмар тӥледлы вань ужано, быдэсъяно ужъёсады котьку но Аслэсьтыз кужымлыко юрттэтсэ мед сётоз. Христос Инмарлэн Улӟыса Султонэзлы шумпотыса, ваньдэс бакель карисько: котьку но тӥ пӧлын шумпотон мед улоз!

ВИКТОРИН

Удмурт Митрополиялэн кивалтӥсез,

Ижкар-Удмурт Епархиысь митрополит

Христослэн Пасхаез

Ижкар

2021 ар

Работает на Prihod.ru при поддержке ORTOX.RU [Войти]
Перейти к верхней панели