Викторин Митрополитлэн Христослэн Вордсконэныз ӟечкылан Гожтэтэз

Удмурт Митрополиялэн Ижкар-Удмурт Епархиысьтыз черкын служба нуисьёсты, монахъёсты, мирын улӥсьёсты
Викторин Митрополитлэн
Христослэн Вордсконэныз
ӟечкылан Гожтэтэз

Туннэ Нылмурт ваньзэ Кылдытӥсез вордӥськытӥз,
Едем-рай нылпи ваён пещерае вуэ но кизили
пеймытын улӥсьёслы Христос шунды шоры возьматэ
(Христослэн Вордсконэзлы сӥзем ӝыт службаысь стихира)

Бырисьтэм-кысӥсьтэм луллыко шумпотонэн ваньдэсты ӟечкыласько югыт-чылкыт праздникен – Христослэн Вордсконэныз но вуэм Выль, 2021-тӥ, арен!

Улон-вылонлэсь бугыръяськонзэ вормыса, кӧс утён пыр лулмугормес кыдатыса туннэ асьмеос Христослэсь сӥзёнъёссэ басьтонэ ӧтемын луиськомы, Инмарлэсь гажан-жалянзэ музъем вылэ васьконэз сярысь пророкъёслэсь азьвыл ик тодытыса веранзэс адӟисьёс луиськомы.

«Кызьы шунды тылсиоссэ потэмезлэсь азьвыл ик дуннелэсь бадӟым люкетсэ югдытэ, озьы ик Христос но Нылмурт пушкысь потыкуз ик, быдэс дуннеез югдытӥз»
Иоанн Златоуст югдытӥсь

Тазьы пеймыт уе музъем вылэ ваське Быдӟым Инмар-Кылдытӥсь. Мария Нылмуртлэсь Инмар Пи Адями луыса вордӥське, Аслаз Инмарлыко югытэныз сьӧлыклэн, уродлыклэн пленаз улӥсь выжыез югдытон понна. Учкоме пещераысь турын тыронын ортчем быдӟым тайна шоры. Уго Инмысь Атаймылэн зэмос яратонэз татын, Вифлеемын, усьтӥське, трос ик дыр ортчытэк, Ассэ курбон карыса, Кирос вылэ ӝутскыны, кулонэз вормыса улӟыса султыны но, адямилы но улӟыса султон сётыны. Со дырысен, туннэ нуналозь Кузё-Инмар асьмемыз ӧте Солэсь ваньзэ гажась яратонзэ тодыны, котьку но со яратонэн, шудбурен улыны мед быгатомы шуыса, уго христиан калыклэн шудбурез со бордын возиське. Яратонэз тодыны луэ соку, куке матысьёсмылы ӟеч ужъёс лэсьтыса улыны кутскиськомы. Соку гинэ асьмеды зэмос христиан адями шуыны быгатӥськомы.

Секытэсь вакытъёсы асьмеос улоно луиськомы: нуналлы быдэ кышкытлыкъёс, куалекъятӥсь ужъёс асьме котырын уло но асьмелэсь кужымтэм луэммес возьмато. Но тодамы ваёме: Христос но Солы пумитъяскись дунне вылэ кужымтэм пичи нуны луыса лыктӥз но сое яратонлэн, зӥбыт-востэм улонлэн кужыменыз вормиз, уго зэм ик шуэмын: «Тон лябӟыса улон дыръя Мынам кужыме юнгес шарае потэ» (2 Кор. 12:9).

Та дун-чылкытэсь нуналъёсы Христослэн Черкысьтыз вӧсяськись калыклы вераме потэ: ӝожъяськыса эн улэ, тырше котырысьтыды калыклы мар ке но ӟечсэ лэсьтыса улыны. Инмарлэсь дэлетсэ басьтон понна мур осконэн уломе, асьмелы гинэ ӟечлык басьтыны ум тырше, ум вӧсяске, тыршоме матысьёсмылэсь но кулэяськонъёссэс быдэсъяны.

Христос Инмар Пилэн паймымон Вордсконэз лулдэс-сюлэмдэс мед юнматоз! Сюлмысьтым вӧсяськыса вань ӟечлыкъёсты сётӥсь Инмарлэсь курисько тӥледлы, тӥляд семьяостылы каньыллыко, тупаса улон, ӟеч тазалык, гажан-жалян, буйгатӥсь дэлето улон.

ВИКТОРИН

Удмурт Митрополиялэн кивалтӥсез,
Ижкар-Удмурт Епархиысь митрополит

Христослэн Вордсконэз
Ижкар – 2021 ар

Добавить комментарий

Работает на Prihod.ru при поддержке ORTOX.RU [Войти]
Перейти к верхней панели